大角咀主題公園

橋底露宿者每朝早上燒紙皮生火煮早點給狗食
球場旁電燈柱頂離奇懸掛著十多雙連體白飯魚
公園草地上花槽石壆不時發現一兩枝白粉針筒
乞兒道長披著一餅黑髮站在安全島上大聲罵街

八十幾歲駝背老婆婆推著垃圾車龜速式過馬路
五十鈴貨車佬急剎在班馬線前幾乎將細路嚇死
十歲未夠死靚仔豆沙喉死要阿媽買呢樣買個樣
機鋪內依然有拳皇 98打機的依然是那個肥仔

一鞠躬再鞠躬三鞠躬家屬謝禮來賓請上前上香

每晚準時八時半舉行破地獄擔幡買水送奈何橋
清晨四點足球場上的士司機聯隊大戰Van仔佬
後巷赤膊燒味佬天光前用火槍炮製脆皮乳豬王

A餐餐蛋飯B餐豆腐火腩飯C餐艾蓉蛋飯送例湯
渠王專門通渠鎖王專門解鎖免費上門水電維修
對面五樓外牆七色晾衫竹掛住聖芳濟白色校服

半夜三更樓下情侶忽發罵戰樓上阿伯大叫收聲

金色魚網拖鞋和黑紅色人字鞋注定是天生一對
每逢周末有人想高價收買音響高價收買電視機
大梗房八百大套房十千二百可煮食合單色人士
製衣廠急聘熟手男技工七千五包午餐天天出糧

那家盧海鵬甜品之家到底係唔係盧海鵬開的呢
公廁內為什麼總有幾件麻甩佬在徘徊或者吹水
天台千萬支魚骨式天線到底哪支才連到我家呢
唔該油麵底豬腸豬皮牛柏葉可唔可以加D腩汁?